Hargeysa(Araweelo News Network)Madaxweynaha Somaliland Axmed Maxamed Maxamuud (Siilaanyo) ayaa magacaabay laba degmo oo cusub oo kala tirsanaanaya Goboladda
Sanaag iyo Saraar ee bariga Somaliland.
War-saxaafadeed uu maanta kasoo baxay xafiiska Madaxweynaha Somaliland oo uu ku saxeexnaa afhayeenka Madaxtooyadda Axmed Saleebaan Dhuxul, ayaa lagu sheegay in Madaxweynuhu digreeto kusoo saaray magcaabista labadaa degmo, wuxuuna qoraalka Madaxtooyadu u dhignaa sidan:-
“Madaxweynaha Jamhuuriyadda Somaliland, Mudane, Axmed Maxamed Silaanyo, waxa uu digreeto Madaxweyne oo Sumadeedu tahay JSL/M/XERM/249-2501/052014 ku magacaabay laba Degmo oo Cusub.
MADAXWEYNUHU:-
Markuu Arkay: Qodobka 90aad iyo Qodobka 109aad, Faqradiisa 3aad ee Dastuurka Jamhuuriyadda Somaliland;
Markuu Arkay:Qodobka 10aad ee Xeerka Gobollada iyo Degmooyinka oo tilmaamaya wax-ka-beddelidda Qaab-dhismeedka Dalka;
Markuu Tixgeliyey: Codsiyada ka yimid Madax-dhaqameedyada, Waxgaradka, Culimada iyo Odayaasha Deegaanka;
Markuu Tixgeliyey:Baahida loo qabo in Degmooyin loo magacaabo Degmada Gudmo Biyo-cas, iyo Degmada Ceegaag Degmooyin cusub;
Markuu Dhegeystay: Soo jeedinta Wasiirka Wasaaradda Arrimaha Gudaha;
Wuxuu go’aansaday;
1. In uu Gudmo Biyo-cas u magacaabo Degmo, taasi oo ka tirsanaan doonta Gobolka Sanaag.
2. In uu Ceegaag u magacaabo Degmo, taasi oo ka tirsanaan doonta Gobolka Saraar.”ayaa lagu yifhi qoraalka digreetada Madaxweyne Siilaanyo.