Hargeysa (ANN) Madaxweynaha Somaliland Axmed Maxamed Maxamuud (Siilaanyo) ayaa la filayaa inuu kulan casuumad ah ku qaabilo mudanayaasha golaha guurtida Somaliland maalinta beri ee 16, Sep 2010, kulankaa oo aan la shaacin ayaa la qorshaynayaa inuu ka dhaco huteelka Maansoor ee magaalada Hargeysa. Sidaana
waxa shebekada wararka ee Araweelonews u xaqiijiyay warar ku dhow dhow madaxtooyada iyo Aqalka golaha guurtida.
Kulankaa oo noqonaya kii u horeeyay ee Madaxweyne Axmed Siilaanyo la yeesho golaha guurtida tan iyo markii uu ku guulaystay doorashadii madaxtooyada ee Somaliland ka dhacaday 26, Jun, 2010, ayaa la filayaa inay ujeedadiisu tahay sidii uu Madaxweyne Siilaanyo uga dhaadhicin lahaa golaha guurtida inay wax ka bedelaan go,aankii mudo kordhinta ee golayasha Wakiiladda, Deegaanka iyo golohooda ee ay dhowaan soo saareen, taas oo uu Madaxweynuhu sheegay inay guurtidu la deg degeen go,aanka, isla markaana qoraalka uu u gudbiyay ku doonayay inay arinta kala tashadaan xisbiyada qaranka iyo komishanka ka dibna soo saaran mudo kooban oo laysla ogolyahay.
Iyadoo go,aankaa ay ku gacan saydheen sadexda xisbi qaran iyo komishanku, kuwaas oo iyaguna dhinacooda soo saaray todobaadkii hore maalin ka dib markii Aqalka Odayaasha ee guurtidu soo saareen mudo kordhintaa golayaasha, balse shirgudoonka golaha guurtida ayaa ku hanjabay iyaguna in aanay ka laabanayn go,aankooda, isla markaana meesha ka saaray heshiiska sadexda xisbi qaran iyo komishanka doorashooyinka qaranka.
Dhinaca kale Shirguddoonka Golaha Guurtida iyo Komishanka doorashooyinka Qaranka Somaliland ayaa maanta markii ugu horeysay yeeshay kulan lagaga wada hadlay sidii dib loo eegi lahaa muddo kordhinta Golaha Guurtidu u sameeyay todobaadkii hore golaha wakiilada, Golayaasha deegaanka iyo mudada golohooda.
Guddoomiye ku xigeenka koowaad ee Guurtida Somaliland Sheekh Axmed Sheekh Nuux Fure ayaa sheegay in arintan si guud looga wada hadli doono, isla markaana uu rajaynayo in meel la isla dhigo xalkeeda.
Sheekh Furre oo maanta warbaahinta ugu waramay xarunta Golaha Wakiilada oo kulanka ka dhacay ayaa sidoo kale sheegay in komiishanka doorashooyinku safar shaqo u tegayaan Magaalada Nayroobi, safarkaa oo sida uu sheegay ujeedadiisu tahay inay wada tashi la soo yeeshaan taageerayaasha dhinaca dhaqaalaha ee doorashooyinka Somaliland, isla markaana laysula qiyaaso mudada ugu haboon ee doorashooyinka muranka hadda ka taagan yahay lagu qaban karo, kuwaas oo kharashkii lagu qaban lahaa ku laalan yahay dawladaha dhinaca doorashooyinka ka taageera Somaliland.
Si kastaba ha ahaatee waxa suurta gal ah in kulanka Madaxweynaha iyo mudanayaasha Aqalka guurtidu noqdo mid fure u noqda in xaalada muranka mudo kordhinta laysla meel dhigo, isla markaana la helo jawi deganaansho iyo mudo macquul ah oo doorashooyin lagu qaban karo oo heshiis lagu yahay.
By, Carraale M. Jama Freelance Journalist and Human Rights Activist
Araweelonews Somaliland Office
E-mail; Info@araweelonews.com
jaamac132@gmail.com
shalcaw2@hotmail.com
+252 2 442 5380