Madaxweynaha Somaliland Oo Shacbiga Ku Hanbalyeeyay Sannad Guurada 51aad Ee Kasoo Wareegtay Markii Ay Xoriyada Ka Qaadatay Somaliland Mustacmaradii Boqortooyada Britain

Hargeysa(ANN)Madaxweynaha Somaliland Md. Axmed Maxamed Maxamuud (Siilaanyo) ayaa manta dhambaal hambalyo ah u diray shacbiweynaha Somaliland gudo iyo dibadba sanad-guurada 51-aad ee ka soo wareegtay markii Somaliland ay xornimadeedii ka qaadatay mustacmaradii

Boqortooyadii Britain 26-kii bishii June 1960-kii.
Sidaasi waxa lagu sheegay war-saxaafadeed ka soo baxay xarunta madaxtooyada oo uu ku saxeexnaa Afhayeenka Madaxtooyada Cabdilaahi Maxamed Daahir (Cukuse) waxaanu u dhignaa sedan:-
“Madaxweynaha JSL, Mudane Axmed Maxamed Maxamuud ( Siilaanyo) Isaga oo ku hadlaaya Magaciisa iyo Ka Qaranka Somalilandba waxa uu Hambalyo iyo Boogaadin u dirayaa Dhamaanba Shacbiga Reer Somaliland Meel kasta oo ay joogaanba, Dalka Gudihiisa iyo Debadiisaba, Xuska, Munaasibada Sannad Guurada 51-aad ee ka soo Wareegtay 26-June-1960 oo ah Maalintiii ay Somaliland Madaxbanaanideeda ka qaadatay Mastucmaradii Boqortooyada Ingiriiska Uk.
Madaxweyne Axmed Maxamed Maxamuud waxa uu Shacbigiisa reer Somaliland u rajaynayaa inay Sannadkan sannadkiisa ku gaadhaan nabad,guul iyo Barwaaqo, waxaanu ugu baaqayaa in ay dhan uga soo wada jeedaan adkaynta nabad-gelyada iyo qaranimada Somaliland isaga oo ku ammaanaya sida ay markasta heeganka ugu yihiin ilaalinta iyo difaaca Qarannimada Somaliland.”