Hargeysa (Araweelo News Network)Xisbul xaakimka talada haya ee KULMIYE ayaa shaaciyay heshiis laga gaadhay khilaaf iyo dood ka taagnaa maalmihii u
dambeeyey kadib markii wasiirada awooda badan ee kooxda wadaada ah ay sawaxan ka abuureen magcaabista gudida qabanqaabada shirweynaha oo ka koobnaa 19 xubnood, kuwaas oo gudoomiye Muuse Biixi Magcaabay, isla markana Madaxweyne Siilaanyo iyo aqlabiyada gudida fulintu taageereen.
Hase yeeshee kulan la doonayay in lagu ansixiyo xubnahaa waxa kooxda wasiiradda ahi ka abuureen buuq, taas oo isugu rogtay in laysla meel dhigi waayo ansixinta xubnaha gudoomiyuhu magcaabay. Sidoo kalena ay kooxdaasi ku gacansaydhay soo jeedin Gudoomiyuha Kulmiye kusoo bandhigay in 7 xubnood lagaga daro gudida fulinta Uraradii dhacay doorashadii golayaasha deegaanka eek u biiray Kulmiye.
Fadhi saacado badan qaatay oo hoggaanka xisbiga iyo xubnaha Guddiga Fulintu ku yeesheen gelinkii dambe ee maanta gudiga Madaxweyne Xigeenka Somaliland ayaa cawayskii laga soo saaray go’aan lagu soo afjaray khilaaf ka dhex oognaa xubno wasiirro ah iyo hogaanka sare ee xisbiga oo ay wehelinayeen aqlabiyadda Guddiga Fulintu, kuwaas oo isku maandhaafsanaa ansixinta 19 xubnood iyo xubnaha lagu kordhinayo gudida fulinta, si loo galo hawsha qaban-qaabada shirweynaha 3-aad ee xisbiga.
Shir jaraa’id oo si wadajir ah u qabteen hoggaanka iyo dhammaan xubnaha Guddiga Fulinta KULMIYE oo ay ka mid yihiin wasiirrada qaybta ka ahaa khilaafka, ayaa waxa halkaa lagaga dhawaaqay heshiiska xisbigu ka gaadhay khilaafkii ka dhextaagnaa iyo magacyada xubnaha cusub ee lagu daray Guddiga Qabanqaabada Shirweynaha 3-aad ee xisbiga.
Guddoomiyaha xisbiga KULMIYE Muuse Biixi Cabdi ayaa ka akhriyey madasha qodobadda heshiiska xisbigiisu ka gaadhay khilaafkii ka dhashay arrimahaa, wuxuuna isagoo arrimahaa ka hadlaya yidhi;
“Shirar u socday Guddiga Fulinta ee xisbiga KULMIYE maalmihii u dambeeyey si loo hagaajiyo diyaargarowga shirweynaha xisbiga ee soo socda; Guddiga Fulinta ee xisbiga KULMIYE markii ay muddo lafa gurayeen oo aan guddoomiyey, markii aan dhegaystay soo jeedintii Guddiga Fulinta iyo hal-doorka xisbiga iyo cid kasta oo ay khusaynaysay, markii guddiga fulintu qoladayada hoggaanka u soo jeedisay in la kordhiyo tirada Guddiga Qabanqaabada oo markii hore ahayd 19 xubnood, kadib markii meelo badan cabasho ka timi haddii ay beelo tahay, waxaannu isla garanay;
1- In Guddiga Qabanqaabada shirweynaha xisbiga KULMIYE lagu daro 8 xubnood oo tirada rasmiga ah ee Guddiga Qabanqaabadu noqoto 27 xubnood.
Guddiga Fulinta ee KULMIYE waxay ansixisay oo ay isku raacay in Guddiga Qabanqaabada shirweynuhu noqoto 27 xubnood, waxaanna codkii loo qaaday ogolaaday 31 xubnood, 2 kale way ka aamustay, guddoomiyuhuna ma codayn, sidaasi ayey ansax ku yihiin 27-kaasi xubnood inay noqdaan Guddiga Qabanqaabada ee shirweynaha KULMIYE.
2- Qodobka labaad ee la isla qaatay waxa weeye, Guddiga Fulinta ee KULMIYE waxaannu kordhinay 7 xubnood oo aannu ka soo qaadnay ururradii RAYS, DALSAN iyo UMMADDA ee KULMIYE ku biiray. Waxa kaloo la buuxiyey 5 xubnood oo ka dhinaa Guddiga Fulinta oo ahaa wax dhintay iyo wax xisbiga ka baxayba oo tiradoodu noqotay 35 hore iyo 7 lagu daray oo isku noqonaya 42 xubnood.
Waxaan aad iyo aad ugu mahadnaqayaa Guddiga Fulinta ee KULMIYE dadaalkii iyo niyad-samaantii ay isku raacday.”
Muuse Biixi waxa uu farriin digniin ah u diray saxaafadda iyo xisbiyada mucaaradka ah oo ka dardaarwerinayey xaaladda xisbal-xaakimka iyo natiijada ka dhalan karta shirweynihiisa.
“Qoladiina saxaafaddu in badan waxaad tidhaahdaan dhul-gariir ayaa ka imanaya KULMIYE, horta KULMIYE xisbi dhul-gariir ka imanayo maaha, qaar saxaafadda ka mid ahi maalmahanba waxay doonaan ayey qorayeen oo qaarkood ayaan warka xun iyo beenta mooyee wax kale qorin, haddaanay xisbiyada kale doodda aqoonin, haddaanay xisbiyada kale sharciga isku qabsan, haddaan dad kale qayladooda la maqal KULMIYE caado ayey u ahayd markuu shirayo in dood kululi ka dhacdo.
Waxa kale oo aan u sheegayaa saaxiibadayada mucaaradka oo muddo iibinayey sariirihii baanu sii diyaarinay dhaawaca KULMIYE la dhigi lahaa iyo gurmadkooda ayaanu soo galaynaa, waxaan leeyahay sidaa aannu ku bilownay ayey ku dhammaanaysaa, horena waad u taqaaneen oo weligiiba KULMIYE oo shirayaa ma gariir-waayin, haddana natiijo fiicani kamay soo bixiwaayin, markaa waxaan u sheegaynaa qaranka iyo ummadda Somaliland waxa u dan ah KULMIYE inuu go’aan wanaagsani ka soo baxo, caawana kii la rabay ayaa ka soo baxay.” Ayuu yidhi Muuse Biixi.
Wuxuuna isagoo ka hadlaya warbaahinta iyo mucaaradka kale sida u qaadaa dhigayeen arrintaa yidhi, “Sidoo kale, qolooyinka mucaaradka iyo saxaafadda ee cimri-dherer ka dhigtay KULMIYE iyo xukuumaddu way is hayaan oo Ina Biixi, Ina Kaahin iyo qolada meesha lagaga tagay, waxaan leeyahay xisbiga KULMIYE Madaxweynihiisa, Guddoomiyihii iyo taageerihiisu horta talo midaysan ayey leeyihiin, taladaa caawala soo saarayna KULMIYE meel kasta oo uu joogo wuu u dhammaa Madaxweynaha ka soo bilow ilaa ka ugu hoseeya mid aanan dhegaysan codkiisa iyo talo-soo-jeedintiisa muu jirin, maanaan qaadan go’aanka ilaa intaan waday, markaa waxaan idiin sheegayaa xisbiga KULMIYE iyo xukuumaddiisu waa mid, xukuumaddu waa tii codka xisbiga lagu dhisay, hawlaheedana wuu ku kormeerayaa oo wuu ilaalinayaa, barmaamujkii xisbigana way ku socotaa,”
Guddoomiyaha xisbiga KULMIYE Muuse Biixi Cabdi waxa uu u mahadnaqay xubnaha Guddiga Fulinta ee xisbiga oo uu sheegay inay u dhabar-adaygeen hawlo adag oo maalmihii u dambeeyey aanay habeen iyo maalin toona ka seexan si loo dhammaystiro u diyaargarowga shirweynaha 3-aad ee xisbiga KULMIYE. Sidoo kalena waxa uu u mahadceliyey masuuliyiinta ururrada hadhay ee 7 xubnood loogu daray Guddiga Fulinta oo uu sheegay inay tanaasul wayn u sameeyeen marka la eego heshiiskii hore ay ula galeen xisbiga.
Sidoo kale, Madaxweyne-ku-xigeenka Somaliland Cabdiraxmaan Cabdillaahi Ismaaciil (Saylici) oo isna shirkaasi jaraa’id hadal kooban ka jeediyey, ayaa sheegay in kordhinta guddiga qabanqaabada oo markii hore hoggaanka xisbiga, isaga iyo ilaa Madaxweynaha ay ku go’aamiyeen inay 19 xubnood noqdaa ay wadahadal iyo dood xisbigu yeeshay kadib daruuri noqotay in tiradooda la kordhiyo. Waxaannu tilmaamay in doodaha iyo in afkaarta la isku qabto uu xisbigooda KULMIYE caado u leeyahay ee aanay ahayn dagaal iyo wax ceeb ah.
Magacyada 27-ka xubnood ee Guddiga Qabanqaabada Shirweynaha KULMIYE:
1. Aamina Yuusuf Aar
2. Faarax Yuusuf Nuur (Xadhigle)
3. Xil. Cabdiraxmaan Cismaan Caalin
4. Abubajar Xaamud Jibriil
5. Sahal Maxamed Jaamac
6. Farax Faarax Cali
7. Dr. Cumar Cilmi Dixood
8. Cabdirisaaq Waabari Rooble
9. Xil. Saleebaan Cawad Bukhaari
10. Amaal X. Axmed Miisaan
11. Cabdiraxmaan Maxamed Jaamac (Cabdi Giirre)
12. Xil. Maxamed Jaamac Cabdi
13. Xil. Siciid Cilmi Rooble
14. Cismaan Garaad Soofe
15. Xil. Maxamuud Axmed Obsiiye
16. Mustafe Faarax Dhoorre
17. Xil. Ibraahim Axmed Haybe
18. Xasan Maxamed Cali (Gaafaadhi)
19. Xil. Maxamuud Jaamac Warfaa
Magacyada xubnaha cusub ee lagu kordhiyey
20. Xildhibaan Cali Obsiiye Diiriye (Cali Gabiley)
21. Maxamuud Axmed Saalax
22. Yaasiin Maxamuud Cabdi
23. Ibraahim Cawke
24. Fu’aad Maxamed Cumar
25. Yuusuf Nuur Maxamed (Gurruuje)
26. Xasan Mowliid
27. Cabdiraxmaan Maxamuud Carraale.
info@araweelonews.com