L
London (Araweelonews Network) Maxakadda sare ee Britain ayaa ku dhawaaqday go’aan ay ka soo saartay dacwad shirkadda Dahabshiil ka gudbisay Bangiga Barclays oo hore u shaaciyey inuu joojinayo adeegyada xawilaadda lacagaha ee Dahabshiil oo ah shirkadda ugu wayn dhinaca
xawilaadaha lacagaha ee qaaradda Afrika.
Go’aanka Maxkamaddu soo saartay maanta waxay ku amartay Barclays in aanu xidhi karin adeegga xisaabeed (account) ee shirkadda Dahashiil ku leedahay Bangigaasi ilaa inta si rasmi ah go’aan maxkameed looga soo saarayo arrintan, taas oo guul wayn u ah guud ahaan dadka Soomaalida ah iyo macaamiisha shirkadda ee daafaha dunida oo eheladooda ku nool Ingiriisku lacagaha u mariyaan Dahabshiil.
“Waxaannu si aad ah ugu faraxsanahay in maxkamaddu aqoonsatay culays ay leedahay dacwadayadu, tani maaha guul u soo hoyatay Dahabshiil oo keliya, balse waa guul iyo war wanaagsan oo ay heleen malaayiin Soomaali iyo Afrikan ah, kuwaas oo noloshoodu ku tiirsanayd adeegga xawilaadda lacagaha aannu sida saxda ah u dirno. Macaamiisha Dahabshiil waxa uu go’aankani uga dhigan yahay inay sii wadataan isticmaalka addeegga xawilaadda ee Dahabshiil mustaqbalka.” Sidaa waxa lagu yidhi war-saxaafadeed ku qornaa luuqadda Ingiriisiga oo Maareeyaha Guud ee shirkadda Dahabshiil Mr. Cabdirashiid Maxamed Siciid soo saaray go’aanka maxkamadda kadib.
Waxa kale oo maxkamaddu xukuntay in Bangiga Barclays bixiyo kharashaadkii shirkadda Dahabshiil kaga baxay muddadii ay ku jirtay dacwadda maxkamadda, iyadoo sidoo kale garsooraha maxkamaddu diiday racfaan Barclays dalbaday inuu ka qaato xukunka ka soo baxay Maxkamadda Ingiriiska.
Maareeyaha Guud ee Dahabshiil waxa uu sharraxaad ka bixiyey muhiimada uu leeyahay adeegga ay bulshada u qabtaan, waxaannu yidhi, “Waxa muhiim ah in la xasuusnaado in aanay shaqadayadu ganacsi keliya ku eekayn, balse waxaannu bixinaa adeegyo aasaas u ah nolosha Soomaalida iyo dad kale oo badan oo ku nool dalalka kale ee Afrikaanka. Waxaannu u suurtogelinay Soomaalida inay is caawiyaan, iyagoo guud ahaan cidhifyada adduunyada lacago uga xawila qaraabadooda iyo asxaabtooda ku nool degaannada Soomaalida, taas oo ay ku dabbaraan cuntada, dawada iyo lacagaha waxbarashada. Sidoo kale, xawilaadda lacagaha waxa loo adeegsadaa maalgashiga iyo abuuritaanka ganacsiga iyo hantida lagu noolaado, iyadoo hay’adaha gargaarka bini’aadanimo sida Oxfam iyo kuwa Qaramada Midoobay ay lacagaha mucaawanada ah ka dirdadaan Dahabshiil. Arrinta kale ee lacagaha aannu xawilnaa ka caawiyaan Soomaalida sidii gacaheeda dib isugu taagi lahayd, ugana bixi lahayd colaadaha iyo xaaladaha nabadgelyo darro ee wehelka u noqday 20-kii sanno ee la soo dhaafay.”
Dacwadda shirkadda Dahabshiil ku oogtay Bangiga Barclays waxay ku salaysay in aannu Bangigu suuqa uu gaarka ku yahay ugu takrifalin si qalad ah oo uu ku xidhayo xisaab-maaliyadeedka Dahabshiil oo muddo 15 sanno ah wadashaqayn lahaayeen, isla markaana aannu keenin wax caddayn ah oo sabab u noqda inuu joojiyo adeeggooda.
“Dahabshiil waxay u hoggaansan tahay dhammaan shuruucda iyo qawaaniinta jira, iyadoo ku kalsoon nidaamka adag ee aannu ku shaqayno. Sida adage e aannu ugu dhaqano shuruucda waxa markhaati-kacaya xidhiidhka wadashaqayneed ee aannu wadaleenahay hay’adaha Qaramada Midoobay iyo NGO-yada caalamiga ah ee horumarinta. Sidoo kale kalsooniyadu waa ta keentay in aannu dacwaddayada keenno maxkamadda sare ee Ingiriiska,” ayuu yidhi Mr. Cabdirashiid Maxamed Siciid.
Ugu dambayntii waxa uu u mahadnaqay dhammaan macaamiisha, dadka Soomaalida iyo kuwa kale ee taageeray shrikadda Dahabshiil, hay’adaha, siyaasiyiin iyo dadka ajaanibka ah ee muujiyey sida ay uga xun yihiin in hab-xisaabeedka Dahabshiil la xidho.
Dhinaca kale mudadii ay socotay dacwada u dhaxaysa Bangigaa oo ah kuwa caansan dunida iyo Shirkadda Dahabshiil, waxa kor u kacay sumcada iyo magaca shirkadda Dahashiil oo si weyn warbaahinta aduunku u qaadaa dhigtay, taas oo muujisay in shirkad laga leeyahay Afrika oo Soomaaliyeed gaadho heer ay wax la qaybsato dunida qawaaniinta iyo sharcigu ka shaqeeyo iyo dalalka ugu awoodda badan dunida oo uu kasoo jeedo Bangiga Barclays oo hore albaabada ugu laabay xisaabaadkii ay ku lahaayeen shirkaddo badan oo laga leeyahay afrika iyo meelo kale, balse shirkadda Dahabshiil oo ay garabtaagan yihiin malaayiin mujtamaca Soomaalida ee ay u addeeegto , Hay’addo iyo shaqsiyaad caan ah ay ku guulaysto inay sharciga la tiigsato Bangigaa si ay uga dhabayso himiladda iyo ujeedooyinka loo aasaasay iyo addeega ay u hayso Bulshada Soomaalida ee ku filqan dacalada dunida iyo dadyoga kale ee xidhiidhka la leh.
info@araweelonews.com
+
jaamac132@gmail.com