Hargeysa(Araweelo News Network) Gudoomiyaha Golaha Guurtida Somaliland. Saleebaan Maxamuud Aadan, ayaa sharci darro ku tilmaamay shir-weynaha qaran ee xisbiyada mucaaridku UCID iyo WADDANI ay sheegeen gogoshiisa dhigayaan si loo faaqido
xaaladda guud ee dalka, kaas oo hada ajandihiisa qarsooon si sir ah loo helay.
“Shir-weyne qaran oo madaxweynahii dalku ka maqan yahay dee shir-weyne qaran noqon maayo, madaxda asxaabtana waanu iska arki,” Gudoomiyaha golaha Guurtida Md. Saleebaan Maxamed Aadan, oo maanta u warramayay qaar ka mid ah saxaafadda.
Shirweynahan qaran waxa markii hore ku dhawaaqay madasha wada tashiga siyaasiyiinta la baxay, hase yeeshee dhawaan ayay sheegeen inaanay awood sharci u lahayn qaban-qaabada arrintan, waxaanay u sii waarideen axsaabta mucaaridka ah ee dalka.
Dhinaca kale Wasiirka Arrimaha Gudaha Somaliland Cali Maxamed Waran-cade ayaa si adag u sheegay in aanay labada xisbi mucaarad xaq u lahayn inay qabtaan shirweyne qaran, isla markaana wuxuu si cad u sheegay in cidda keliya ee shirweyne qaran ku baaqi karta, ama iclaaim kartaa uu yahay Madaxweynaha Somaliland, taas oo uu sheegay in Dastuurka Somaliland awood u siinayo marka ay yimaadaan baahiyo lagama maarmaan ah.
info@araweelonews.com
+
jaamac132@gmail.com
//