Al-shabaab Oo Sheegtay In Ay Khaarajiyeen Taliye Ku Xigeenkii La Dagaalanka Argagixisada Oo Ahaa Xidhiidhiyaha Dhinaca Mukhaabaraadka Ee CIA-da

Mogadishu(Araweelo News Network)Afhayeen u hadlay Al-shabaab oo lagu magcaabo Abuu Muscab oo warbaahinta la hadlay ayaa sheegay in ay  ciidankoodu

hawlgal ku khaarajiyeen Col. Ibraahim Axmed Faarax oo uu sheegay inuu ahaa Taliye ku xigeenkii ciidanka la dagaalanka Argagaxisada.

Abuu Mascab oo waxa uu sidaa ku sheegay war lagu baahiyay warbaahinta, isagoo yidhi,  “Sarkaalka Ashahaadda ladirirka ah ee Ibraahim Axmed Faarax iyo mid kale oo la socday ayay mujaahidiintu ku dileen halka ay iska galaan degmooyinka Waaberi iyo Xamar Jajab,murtadkani wuxuu ahaa Ninkii mas’uulka ka ahaa qalabka muslimiinta Lagu Jaajuuso ee yaal xarunta Xalane”ayuu yidhi Abuu Muscab.

Afhayeenka Al-shabaab, wuxuu sheegay in Col.  Ibraahim Axmed Faarax uu ahaa Jaasuus weyn oo xidhiidhiye u ahaa CIA-da Mareykanka iyo Dowladda Federaalka, islamarkaana mas’uul ka ahaa qalabka Taleefanada lagu dhageysto oo uu sheegay inuu ku rakibanyahay xerada Xalane.
Xukuumadda Dawlada Federaalka Somalia, ayaan weli ka hadlin sheegashada Al-shaabab ku sheegatay in ay khaarajiyeen sarkaalkaa, balse warbaahinta dawlada ayaa sheegtay weerarka lagu khaarajiyay taliye ku xigeenka.

Al-shabaab waxay hore ugu hanjabtay in ay mudada lagu gudajiro bisha barakaysan ee Ramadaan sii laban laabayaan weerarada ay ku hayaan dawlada Federaalka iyo Ciidamada shisheeye ee ku sugan Mogadisho.