Hargeysa(Araweelo News Network) Axmed Ibraahim Axmed (Darmaan) oo muddo laba bilood ah Maxkamad la’aan ugu xidhan Xarunta C.I.D ee magaalada Hargeysa, ayaa
Axmed Darmaan oo ka tirsan Kooxda Kubadda Koleyga ee Ciidanka Qaranka Somaliland, ayaa habeenimadii 18 bishii February 2013 xabsiga loo taxaabay, iyadoo aanay ilaa hadda hay’adda Sirdoonka oo xadhigiisa ka dambeeyay iyo ciidamada Baadhista Dambiyada ee Bileyska Somaliland oo gacanta ku hayaa, Maxkamadaha u gudbin dambiga loo haysto, isla markaana aanay eheladiisa u soo bandhigin dambiga ay u haystaan ee ay ku heleen.
Hooyo Mako Axmed Warsame oo ah hooyada dhashay Axmed Darmaan ayaa caawa u xaqiijisay in wiilkeeda oo muddo laba bilood ah dulmi loogu haysto xabsiga uu cuntadii ka soomay maanta duhurkii, isla markaana Qadadii iyo Cashadii loogu geeyay Xabsiga siddoodii caawa looga soo celiyay.
Waxa kale oo ay Hooyo Mako oo ay murugo badan wejigeeda ka muuqdaa, isla markaana ilmada iska tiraysaa sheegtay in tan iyo markii xabsiga loo taxaabay aan ilmaheeda indhaha ka qaadin oo ay Bileysku u diideen inay tusaan wiilkeeda, sidaas darteed aanay ka sheekayn Karin warna ka hayn xaalad uu haatan ku sugan yahay, iyadoo cuntada ay u geysana ay askarta uuni albaabka kaga qaadi jirtay, sidaas darteedna aanay ogeyn in cuntadaasi gaadho wiilkeeda.
Hase yeeshee waxay Hooyo Mako sheegtay in caawa markii la soo celiyay weelkii cuntada maanta duhurkii iyo caweyskii caawa loogu geeyay, ay aragtay cuntadii oo siddeedii ugu jirta, kadibna markii ay waraysatay dadkii cuntada u geeyay caawa ay u sheegeen inuu Axmed Darmaan diiday cuntada.
Axmed Darmaan ayaa ah bukaan-socod qaba xanuunka Macaanka, oo ah nooc halista ah, isla markaana maalintii laba jeer qaadan jiray dawada iraabka ah oo macaanka loogu qoray, kaas oo aanay suurto-gal ahayn inuu irbaddaas macaanka qaato maadaama oo uu cuntada joojiyay, sidaas darteed ay halis ku jirto xaaladiisa caaafimaad oo haddii ay sidaas ku sii jirto xaaladiisu khatar gelinayso naftiisa.
Ciidanka Baadhista Dambiyada ee Bileyska iyo Sirdoonka Qaranka oo la sheegay inay xadhigiisa ka dambeeyaan ayaan ilaa hadda wax dambi ah ku soo oogin Muwaadinkan, waxaanay markii ugu dambaysay oo ahayd bishan horraanteedii ay hay’adaha gacanta ku hayaa Maxkamadda Rafcaanka ee Hargeysa ka soo korodhsadeen muddo 45 cisho ah oo ay rumaan ahaan ugu sii hayaan xabsiga, iyagoo ku andacooday inay weli waddaan baadhis ay sheegeen inay ku hayaan muwaadinkan.
Qaar ka mid ah hay’adaha xuquuqda aadamaha Somaliland ayaa marar hore cambaareeyay xadhiga muwaadinkan, isla markaana ku tilmaamay xad-gudub loo geysanayo muwaadin aanu caddayn dambi uu faraha kula jiray, waxaanay ugu baaqeen xukuumadda iyo hay’adaha ammaanka inay Maxkamaddaha dalka horkeenaan si loogu qaado dambi ay sheegeen in loo haysto.
Qoyska Axmed Darmaan ayaa sidoo kale saq-dhexe guriga lagu weeraray, iyadoo tacadi farabadan loo geystay qoyskaas, isla markaana agabkii iyo gurigoodaba khasaare la soo gaadhsiiyay, ilaa haddana aanay ciidamada Bileyska iyo Sirdoonka fuliyay weerarkaasi aanay sheegin sababta keliftay weerarka gurigaas lagu qaaday iyo inay heleen wixii ay raadinayeen ee kelifay inay saq-dhexe dumar iyo caruur gurigooda hurudda si argagax leh ugu daataan.