Kismaayo(Araweelo News Network) Axmed Maxamed Islaan (Axmed Madoobe) oo ka mid ah dhawr hogaamiye oo mid walba sheegtay in isaga lagu doortay shirkii Kismaayo ka socday mudada dheer ee la doonayay in maamul loogu sameeyo
Axmed Madoobe oo ku doodaya in isaga loogu doortay madaxweynaha maamulka Jubaland shirkaa ayaa sheegay inuu soo dhaweynayo war-murtiyeedka ka soo baxay madaxda ururka IGAD ee ku baaqayay in dowladda Somalia ay u qabato dhinacyada Jubbooyinka shir dib u heshiisiineed si loogu dhiso oo maamul ku meel gaadh ah.
Balse waxa uu Axmed Madoobe sheegay in Jubooyinka uu maamul u dhisan yahay, isla markaana aanay oggolaan doonin in maamul cusub mar kale la soo dhiso, wuxuuna xusay in shirka IGAD ku baaqday ee dowladdu ay hormuudka ka noqon doontaa uu yahay mid lagu dhammeystiri doono maamulka ay iyagu hore u dhiseen ee uu Madaxweynaha u yahay. Laakiin aanu ahayn mid mar kale maamul cusub lagu dhisayo, taas oo haddii ay dhacdo uu sheeegay in aanay aqbalayn.
Axmed Madoobe waxa uu sidaa ku sheegay Waraysi uu maanta 25 May 2013, siiyay Idaacada Maraykanka laanteeda Af-soomaaliga ee VOA, isagoo oo dhinaca kale dowladda Federaalka ku eedeeyay inay qas ka wado gobollada Jubbooyinka, isla markaana ay ka danbeyso maamullada lagaga dhawaaqay Kismaayo, wuxuuna sheegay in wixii dhibaato ee Kismaayo ka dhalata ay mas’uuliyaddeeda qaadi doonto dowladda Soomaaliya.