Hargeysa(ANN) Madaxweynaha Somaliland Axmed Maxamed Maxamuud (Siilaanyo) ayaa maanta xafiiskiisa ku qaabilay wefdi ay hogaaminay kaaliyaha xoghayaha wasaaradda Arrimaha debeda ee Denmark . kulankaa oo aanay saxaafdu goob jog ka hayn ayaa laga soo saaray
kulanka kadib qoraal ku saabsan waxyaabihii ay madaxweynaha iyo wefdigu ka wada hadleen. Qoraalkaa oo kasoo baxay qasriga madaxtooyada wuxuu u qornaa sidan;-
“Weftigan oo ay Hogaaminayso Ms. Sus Ulbæk Kaaliyaha Xog-hayaha Wasarada Arrimaha Debeda ee Denmark, ugu horaynba waxa uu Madaxweynuhu Weftiga uga waramay Xaalada Guud ee dalka waxaanu madaxweynuhu weftiga si mugleh u dareensiiyey heerka ay maanta taagan tahay Somaliland oo uu sheegay in ay Dawladnimadeedu kaamil tahay.
Madaxweynuhu wax uu Weftiga uga waramay Jidka Dheer ee ay Somaliland u soo martay in ay halkan soo gaadho iyo sida ay u xaqiijisay nabad gelyada iyo Dhismaha Qaran ku dhisan hanaanka Dimuqraadiyada, waxa kale oo uu madaxweynuhu Weftiga uga waramay Dadaalka ay Somaliland ka samaysay ladagaalanka Budh-cad badeeda iyo sida ay Xukuumadu diyaarka ugu tahay in ay Beesha caalamka kala shaqayso Nabad gelyada Mandaqada oo dhan.
Ugu danbayna Madaxweynuhu waxa uu Weftiga u sheegay kaalmada ay Somaliland uga baahan tahay Caalamka oo ay ugu horayso in ay Beesha caalamku Gacan ka gaysato Dadaalka ay Somaliland ay la timid.
Madaxa Weftiga Ms. Sus Ulbæk oo ah Kaaliyaha Xog-hayaha Arrimaha Debeda ee Wadanka Denmark ayaa Somaliland ku amaantay sidii wanaagsanayd ee ay u dhacday Doorashadii Madaxweynaha ee Dhawaan Dalka ka qabsoontay oo ay Madaxweynaha ku Hambalyeysay.
Ms. Sus Ulbæk waxa ay Madaxweynaha ku wargelisay in ay Dawladeedu Diyaar u tahay in ay Dawlada Somaliland toos ula dhaqanto oo ay maanta wixii ka danbeeya kaalmada ay siinayso toos u soo marin doonto Dawlada Somaliland ee aanay sidii hore u dhici jirtay aanay u soo marin doonin Hay’adaha Sama Falada.
Ms. Sus Ulbæk Kaaliyaha Xog-hayaha Wasarada Arrimaha Debeda ee Denmark waxa kale o ay Sheegtay in ay Somaliland ka caawin doonto Dhinaca Nabad gelyada, Maamul wanaaga iyo Geedi socodka Dimuqraadiyada waxaanay Sheegtay in ay Dawladeedu u aragto in ay Somaliland ku dayasho mudan tahay marka la eego sida ay nabad gelyada u xaqiijisay iyo Sida ay u korayso Dawladnimadeeda ku dhisan Hanaanka Dimuqraadiyadu.
Weftigan oo Dalka ku jooga Socdaal Laba Maalmood qaadanayaa waxa ay kulamo la yeelan doonaan inta ay joogan Dalka Wasiirada Wasaaradaha, Khaarajiga, Maaliyada iyo Qorshaynta.
Dhinaca Somaliland waxa kulankan Madaxweynaha ku wehelinaayey Wasirka Arrmaha Debeda Dr. Maxamed Cabdilaahi Cumar iyo Wasiirka Qorshaynta Dr. Sacad Cali Shire, Dhinaca Weftigana waxay kala ahaayeen:-
1. Ms. Sus Ulbæk. Kaaliyaha Xog-hayaha Wasarada Arrimaha Debeda ee Denmark
2. Ms. Anne Ehrenreich Head of Department MoFA, Denmark
3. H.E. Geert Aagaard Andersen, (new) Ambassador to Kenya (GAA)
4. Mr. Thomas Thomsen, Chief Adviser, MoFA Denmark
5. Mrs. Betina Gollander, Counsellor Development (BG)
6. Ms. Pernille Mortensen, 1st Secretary, Embassy of Denmark, Addis Ababa.”
By, Carraale M. Jama Freelance Journalist and Human Rights Activist
Araweelonews Somaliland Office
E-mail; Info@araweelonews.com
jaamac132@gmail.com
shalcaw2@hotmail.com
+252 2 442 5380