Hargeysa(ANN)Xukuumadda Somaliland ayaa canbaaraysay dilkii foosha xumaa ee xalay lagu khaarajiyay Weriye Marxuum Axmed Saaki Faarax oo ka mid ahaa weriyayaasha ka hawlgala TV-ga Universal.
Wasiirka warfaafinta, dhaqanka iyo wacyigelinta Abiib Diiriye Nuur (Abiib Timacad) ahna Afhayeenka Xukuumadda Somaliland, ayaa si adag u cambaareeyay falkii foosha xumaa ee xalay lagu dilay Weriyihii Universal ee magaaladda Laas-caanood Marxuum Axmed Saki Faarax oo ay dabley aan la aqoonsan xalay ku khaarajiysay gudaha badhtamaha Laascaanood.
Sidaasna waxa Wasiirku ku sheegay war-saxaafadeed uu soo saaray oo u dhignaa sidan:-
“Xukuumadda Jamhuuriyadda Somaliland waxay tacsiyadeynaysaa Qoyskii, qaraabaddii iyo dhammaanba bahda warbaahinta gaar ahaanna TV-ga Universal ee uu u shaqaynayay Marxuum-Axmed Saki Faarax oo xalay lagu dilay Magaaladda Laascaanood.
Xukuumadda Somaliland waxay cambaareynaysaa falkaasi foosha xun, iyadoo qarankani aanu u dul qaadan doonin falalka noocan oo kale ah oo ugub ku ah dalkan.
Hay’addaha amniga u xil-saaranina waxay ku hawlan yihiin sidii ay gacanta ugu soo dhigi lahaayeen Dambbiileyaashii dilkaasi geystay.” ayaa lagu yidhi qoraalka afhayeenka xukuumadda Somaliland.
Araweelonews Mobile
Somaliland Office
E-mail; Info@araweelonews.com
jaamac132@gmail.com
shalcaw2@hotmail.com