Hargeysa(Araweelo News Network) Madaxweynaha Somalialnd Axmed Maxamed Maxamuud (Siilaanyo), ayaa u gudbiyay golaha wakiiladda Somaliland xubinta Komishanka Doorashooyinka ee Xisbiga Mucaaradka ee WADDANI, taas oo muran ka taagnaa
maalmahan. Kadib markii Madaxweyne Siilaanyo ku gacansaydhay xubin hore uu ugu gudbiyay Guddoomiyaha WADDANI.
Qoraal kasoo baxay Qasriga Madaxtooyadda oo lagu shaaciyay xubinta cusub ee WADDANI oo Madaxweyne Siilanyo u gudbiyay Golaha ayaa qornaa sidan:-
“Madaxweynaha Jamhuuriyada Somaliland, Mudane. Axmed Maxamed Silaanyo
waxa digreeto madaxweyne oo sumadeedu tahay JSL/M/SHGW/081-2818/102014 ,
Shir-guddoonka Golaha Wakiillada Jamhuuriyada Somaliland ugu gudbiyey Xubintii todobaad ee Xisbiga Waddani soo bedelay.
Ku: Shir-guddoonka Golaha Wakiillada JSL
Ujeedo: Soo Gudbin Xubintii Ka Dhinnayd Guddida Cusub ee Doorashooyinka Qaranka
Mudanayaal, Waxaan si sharaf iyo qadarin mudan halkan magaciisa iyo CV-giisa idiinku soo gudbinayaa Mudane, Cabdiraxmaan Cismaan Aadan (Sagal) oo ah Xubinta Xisbiga WADDANI u soo xulay Guddida Doorashooyinka Qaranka si aad uga gudataan waajibaadkiinna Dastuuriga ah.” ayaa lagu yidhi qoraal saxaafadeedkaa oo uu ku saxeexanyahay Xoghayaha gaar ah ee Xafiiska Saxaafadda Madaxtooyadda Somaliland Naasir Yuusuf Daahir (Naasir Naska)