Xildhibaan Ka Mid Ahaa Golaha Guurtida Somaliland Oo Geeriyooday

Hargeysa (ANN) Allah haw naxariistee Marxuum Cumar Faarax Budeeye oo ka mid ahaa Odayaasha golaha guurtida Somaliland ayaa maanta ku geeriyooday magaalada Hargeysa. Marxuumka oo ka mid ahaa Odayaasha ugu da’ada weyn golahaa ayaa door mihiim ah kasoo qaatay nabadayntii Somaliland, wuxuu mudo dhawr sanadood ah u jiifay dhaawac kasoo gaadhay gaadhi la qalibmay.
Madaxweyne kuxigeenka JSL, ahna ku simaha Madaxweynaha JSL, Mudane Cabdiraxaan Cabdilaahi Ismaaciil (Saylici) waxa uu tacsi u dirayaa Golaha Guurtida, Qoyskii, Qarabadii, Ehelkii, iyo  Shacbiga Reer Somaliland, oo uu ka tacsiyadaynaayo Geerida naxdinta leh ee ku timid XILDHIBAAN CUMAR FAARAX BUDEEYE oo ka mid ahaa Golaha Guurtida JSL, kuna geeriyooday magaalada Hargeisa maanta.

MARXUUMKU waxa uu ka mid ahaa odayaashii sida weyn uga qayb qaatay nabadayntii iyo hub ka dhigistii Ciidamada JSL.

Madaxweyne kuxigeenku waxa uu MARXUUMKA ILLAAHAY uga baryayaa inuu naxariistii janno ka waraabiyo,  Dhamaanna Qoyskii, Qarabadii, Ehelkii, iyo Golaha Guurtida  iyo guud ahaanba Shacbiga Reer Somaliland, in uu samir iyo iimaan ka siiyo MARXUUMKA.

IN-NAA ILLAAHI WA IN-NAA ILLAAHI RAAJUCUUN