Laasqoray(Araweelo News Network) Madaxweynaha Somaliland Axmed Maxamed Siilaanyo iyo wefdi uu hogaaminayo oo xalay u hoyday qudbiga Sheekh Isaxaaq ee Xiis iyo Maydh ayaa saaka ku waraaberiistay
Magaalada xeebta qadiimka ah ee Laasqoray oo dhacda xadka dhinaca badda ee kulaalaya Boosaaso.
Madaxweynaha iyo wefdigiisa ayaa si weyn loogu soo dhoweeyay halkaa iyadoo wefdiga Madaxweynuha dadweynaha magaalada Laasqoray oo ruxaya caleemo qoyan kaga hortageen meel ka baxsan magaalada,
Madaxweyne Siilaanyo oo markaa kadib la hadlay dadweynaha Laasqoray, wuxuu balanqaaday mashaariic dhinaca horumarka ah iyo adeegyada aasaasiga ah in ay xukuumaddiisu ka qabanay deegaanka, isagoo dhagax dhigay Dekedda qadiimka ah ee Laasqoray, Wershed kaluunka ah iyo wadada isku xidha Ceergaabo iyo Laasqoray.
Sidoo kale Madaxweyne Siilaanyo, wuxuu dhagax dhigay Goobo dhismayaal adeegyada bulshada ah sida Caafimaadka, dib u habayn lagu samaynayo xafiisyada Haya’ddaha dawlada sida saldhiga Booliska iyo goobo kale oo uu sheegay in mudo bil gudeheed ah ay ku dhamaynayaan dhismayaashooda, wuxuuna maanta gelinkii danbe kusoo laabtay dhinaca magalooyinka Xiis iyo Maydh oo Madaxweynaha iyo wefdigiisu u hoydeen xalay, isagoo galabka u gudbay dhinaca magaalada Ceergaabo oo si weyn loogu soo dhoweeyay madaxweynaha iyo wefdigiisa.
Socdaalka Madaxweyne Siilaanyo oo ka bilaabmay galbeedka Somaliland ayaa isaga talaabay xeebaha galbeedka ee Saylac ilaa Laasqoray, kaas oo qaatay dhawr maalmood, wuxuuna ahaa socdaal si weyn bulshada Somaliland usoo dhowaysay oo taariikhi ah.