Waxaa curiyay Abwaan Saleban Cabdi Cali (Kalshaale), oo ah suugaanyahan qoraa suxufi ah.
Gabaygu wuxuu ku bilaamayaa sidan:-
Inkastoon Dharaariyo ku leday dhawr saniyo Haatan.
Dhulka Hooyo Dhiigii SNM Dheefta laga joogo
Dhisme Qaran markii laga dhidbaan Dhoolka aaminaye.
Dhaayahayga Maan gelin dibaa laysu dhaawiciye.
Dherigaan Dhurwaagiyo ka ridnay Haada Dhuranaysa.
Kuwaan dhinacna loo dhaafinayn Dheefta laga quuto (SNM).
Ma haday dhafoor taabashiyo Xeerar Jabaq-dhawra
Dib dhankooda uga soo Unkeen Xaajo dheelidaye
Sharcigii siyaad lagu dhibsaday ee dhib laga doortay.
Xornimada ku-dheregbaa rag badan Iilka loo dhigaye
Dheg xumada ka dirirbaa Malyuun loogu dhaawacaye
Dhedigiyo laboodkuba waatay wada dhaqaaqeene
Dhaaxay Xas iyo Buur Jafeen Dhiiri-qabayaale
Iyagoo dhan-qalaneey dhacdiyo weerar ridayeene
Dherigaan Dhur-waagiyo ka ridnay Haada dhuranaysa
Kuwaan dhinacna loo dhaafinayn dheefta laga quuto
Ma haday dhafoortaabashiyo Xeer jabaq-dhawra
Dib dhankooda uga soo Unkeen Xaajo dheelidaye
Sharcigii siyaad lagu dhibsaday ee dhib laga doortay.
Dhaqaaliyo abuurbay dadkani Nolol ku dhaaxdeene
Laba dhagax dhexdoodbay rajada dib uga dhuuxeene
Dhirin-dhirinta Nabadaa wakhtiyo dhiigba loo huraye
Waatay talada dhiibeen ragaan Guluf dhaqaajeene
Dhiilkii Togdheer lagu galiyo qaranka dhuuxiisa
Kuwaan dhinacna loo dhaafinayn dheefta laga gaadho
Ma haday dhafoor taabashiyo Xeerar Jabaq-dhawra
Dib dhankooda uga soo unkeen xaajo dheelidaye
Sharcigii siyaad lagu dhibsaday ee dhib laga doortay.
Afartaa dhameeyaye hadaan dhinac u sii dhaafo
Dhulka wadhatadii lala simee Cagaftu dhoob-dhoobtay
Dhuunigay cunaayeen kuwii dhayalka loo daadshay
Dhalan-dhoolka waxa loogu riday cidi ma dhaadayne
Dhagarihii Kalshaaliyo Buqdhadu waa Mashruuc dhimane
Dhulka Saaxil murankii ka dhacay dhugato-weeyaane
Axmed dhagax dhibiishaa dhextaal waa dharaarahane
Dhanka saylac waataa xumaan looga dhaadhacaye
Dhumucdii Midnimadaa shar iyo dheeli loo Rogaye
Dhaamkii Gumaystuhu dhisaa dhaanka loo raraye
Dhooqiyo Ajaa Haamihii dhuuca loo dhigaye
Ka dhursuga dadweynoow hadeer waano kale dheere.
Xisbigii Dadweynuhu dhistee talada loo dhiibay
Xisbigii la wada dhaadayee dhuraha loo boobay
Dhibaad celin halkii laga rabuu dhiilo soo faqaye
Dhacdo riiq leh dhawrkay hayeen dhidibka loo aasye
Dhako faar la wada qaad tan iyo dhidar xambaarkiiye
Dhambaal iyo hashii loo lisaa dhaafay xeradiiye
Shicibkii dhamaan doortaybaa dhigay Hankoodiiye
Dhalintii la hodaybaa mar kale dhiibay noloshiiye
Ka dhursuga dadweynoow hadeer waano kale dheere.
Dhengedbaaba lala boobayaa kii ka dhiidhiya e
Ma Ogola dhaliil iyo tilmaan sida dhigiisiiye
Dhegta iyo ishaa lagu hayaa ruux kastoo dhaqane
Dhibanaha xaqiisaa ninkii dhacay u doonaaye
niman Dhoof ka yimibaa dadkaba mooday dhigahoode
Dhayalbay u haystaan rugniga dawlad loo dhigaye
Dhaqankii qabiilkaa mar kale dhiilka loo culaye
Dhumucdiyo midnimadii jifaa looga dhaadhacaye
Ka dhursuga dadweynoow hadeer waano kale dheere.
Afartaa dhameeyaye hadaan dhinac u sii dhaafo
Xasanow Dhawaaqayga Gabay wayska dhalanteede
Dhan kastoon ka eegaba wakhtigan taladu waa dhiife
Dhabaday ku toostaa cadoo dhimatay Maandeeqe
Waxba yaanan dhiilayn warkaa maanta soo dhacaye
Dhab u fiirso dhinacyada dalkiyo dhiiga qubanaaye
Dhalintii Hargeysiyo dhankaa Saylac iyo Awdal
Sida qumac dhalfiifaha ka dhigay loola dhacay heedhe.
Dhirbaaxooyinkaa badan si aan looga dhiidhiyinba
Ama cidi dhamaaliyo u qorin weedho lagu dhaado
Car dhawaaq hadii lagugu yidhi dhimayay yoolkiiye
Dhicisowday heestii doraad heelka loo dhigaye
Dhaamkii Gumaystuhu dhisaa dhaanka loo raraye
Dhooqiyo Ajaa Haamihii dhuuca loo dhigaye
Ka dhursuga dadweynoow hadeer waano kale dheere.
Dhiggii Odaygi laga doortayee calanka loo dhiibay
Isaga iyo dhashuu soo xushee dhabada loo jeexay
Dhuuxiyo markay maaruqeen dhaxal hadhkii Dheriga
Saw inay dhar-dhaarada cunaan dhaqanku muu gaadhin
Oo dhuxul kumay shidin hankiI dhigayay Taariikhda
Adigiyo dhigaagana hadeer looma soo dhiganin.
Dheemaalka shacbigii kal hore dhididku hooraayey
Dhankaalnimadu waa waxa dhexdiyo dhoorka loo jaraye
Kuma dhibo Hugaagoo madhaa dhaxanta dayreede
Ha yeeshee dheg xumo waa markuu dhafad la heermaaye
Dhayalsiga aduunkaa ku jira dhaxal xumaantaase
Dhooliga hadeer lagu sidaa waa mid dhaar qaba’e
Ka dhursuga dadweynoow hadeer waano kala dheere.
Halkuu dhigayo goor dhaw dhulkiyo samada dheegeeda
Dhal-dhalaalka Xamarbaa u dhaw dhiilka loo culaye….
Dhal-dhalaalka xamarbaa u dhaw dhiilka loo culaye.
Dhammaad
waxaan ka cudur daaranayaa wixii qadaf ah ee idiinka dhex muuqda ama aragti ahaan idiin cuntami waayaa inaanay ahayn waxaan ula kasay, laakiinse iyadoo la kala aragti duwanyahay, hadana Khaladku wuu dhacaa.