Hargeysa(ANN)Mudaneyaasha Aqalka Gollaha Guurtida Somaliland ayaa bilaabay dood ay ku naaqishayaan siyaasada gudaha ee xukuumadda Somaliland iyo sidii Haweenka iyo Beelaha laga tirada badan yahay doorashooyinka soo socda loogu xidhi lahaa kuraas kooto ah oo aanay cidi kula tartamin.
Guddoomiyaha Gollahaa Saleebaan Maxamuud Aadan, ayaa gudoominayay fadhiga gollaha ee maanta, kaas oo ay mudanayaasha ka qayb galay doodaa aragtidooda ka dhiibteen, iyagoo soo jeedimo iyo talooyin biya dhacoodu aanu kala fogayn oo isku mid ahaa ka soo jeediyay madasha, marka laga reebo dhawr muddane oo ku dooday in aanay jirin sabab kooto loogu xidho beelaha laga tirada baddan yahay, balse loo baahan yahay inay muwaadiniinta kale ula sinnaadaan tartanka doorashada ee ka mid noqoshada gollaha guurtida iyo gollayaasha kaleba.
Mudane Axmed Ismaaciil Cabdi, Yuusuf Cabdilaahi Cawaale iyo Axmed Nuur Aw Cali, oo ka mid ahaa Mudaneyaashaa dooda ka qaybgalay ayaa sheegay inay soo dhawaynayaan in Haweenka loo cayimo kuraas gaar ah oo aanay cidi kula tartamin, laakiin waxay xuseen in beelaha laga tirada badan yahay hore kuraas looga siiyay Gollaha Guurtida oo beeluhu soo xulaan xubnaha aqalkaasi. Xiligana ay ku jiraan mudaneyaal ka soo jeeda beelaha laga tirada badan yahay iyo kuwa la haybsooco.
Mudaneyaashaasi waxa kale oo ay sheegeen inaanay jirin sabab kuraas gaar ah loogu xidho beelaha laga tirada badan yahay oo ay muwaadiniinta kale ula sinaadaan tartanka ka mid noqoshada golayaasha Baarlamaanka.
Dooddaa ayaa golluhu u balamay inuu sii ambo qaado maalinta beri ah. Iyadoo ay mudanayaasha qaarkood dooddooda ku xuseen in la adkeeyo nabadgelyada dalka, isla markaana kor loo qaado wada shaqeynta Ciidamadda ammaanka iyo dadweynaha Somaliland, iyadoo mudanayaasha qaarkood soo jeediyeen inay in la taageero siyaasadda arrimaha debedda Somlailand ee xiligan, halka ay dalbadeen inay gollaha hor yimaadaan Wasiirka Arrimaha iyo Jananka Ciidanka Bilaysku si wax looga weydiiyo arrimaha amaanka dalka.
Dhinaca kalena waxay Xukuumadda ku bogaadiyeen heshiisyaddii lagu soo afjaray mushkiladihii collaadeed ee deegamaadda kalshaale iyo Ceel Berdaale.
Araweelonews Mobile Somaliland Office
info@araweelonews.com