Doorashadii Tijaabada ahayd ee ay dhowaan qabteen Gudida Doorashooyinka Qaranku oo Qorshaha laga lahaa ahaa in lala socdo sida loo waajahayo qabashada doorashada dawladaha Hoose oo la qorsheeyey in diiwaangelin la’aan la hirgeliyo, xilli astaanta musharaxa iyo sawirkiisa laga reebay
in lagu calaamadiyo warqadda codaynta lana siiyo musharax walba Number gaar ah maadaama ay musharaxiinta iyo axsaabtuba ka badan yihiin sidii hore. ayaa dhanka kale waxaa hubaal ah in doorashadaasi ay xambaarsanayd ujeedooyin intaa ka fog oo ahmiyad balaadhan u leh dadka iyo dalka Somaliland, gaar ahaan marka la eego waqtiga lagu beegay iyo sida ay wax ugu kordhin karto.Ugu horayn doorashada tijaabada ahayd waxay ku soo beegantay maalmo ka hor xuska 18 may, ee Sanadguurada 21-aad ee ka soo wareegtay markii Somaliland la soo noqotay madaxbanaanideeda sanadkii 1991-kii, waxayna doorashadu qayb ka qaadatay muujinta dariiqa dimuqraadiyadeed ee ay Somaliland ku socotay mudadaa rubuc qarniga ku dhow, sidaana ay qabashada doorashadu ahmiyad ugu lahayd sida loo muujinayo waxii ay Somaliland qabsatay xiligaa aynu xusnay.
Tijaabinta Doorashadu waxay qayb ka ahyd hagaajinta Sumcadda Somaliland xilli ay dhowaan furmi doonaan wadahadaladii dhexmari lahaa Somaliland iyo Somalia, kuwaasoo ku qotoma qayimka labadii dawladood ee is raacay sanadkii Afrika ee 1960-kii, ka dib intii aanay Somaliland dib uga bixin Midnimadii lagu khasaaray. ee laga dhaxlay daymaha shisheeye, dagaalada sokeeye, darxumo nolosha guud ah iyo dalkii oo magaalo keliya noqday.
Ahmiyada kale ee doorashada tijaabada ahayd u lahayd wadankan waxay ahayd iyadoo gudida Doorashooyinku u muujiyey beesha caalamka sida ay diyaarka ugu yihiin qabashada doorashooyin xidhiidh ah oo la hirgeliyo sadexda ilaa afarta sano ee soo socda, xilli beesha caalamka laga sugayo dhaqaalaha ku baxaya doorashada rasmiga ah ee dawladaha Hoose, taasoo la filayo inay qabsoonto rubuca dambe ee Sanadkan. Halka aanay meesha ka madhnayn in gudida laftooda oo hadhsanaya dhismaha cusub ee xaruntooda guud ay tijaabo gaar ah u ahayd sida ay xafiisyadan cusub ee horumarsan ugu shaqayn doonaan mustaqbalka dhow.
Dhinaca gudaha hadii aynu eegno qabshada doorashadu waxay ku soo beegantay maalin ka bacdi markii bariga caasimadda Hargysa uu ka dhacay fal fool xumo lahaa oo lagu weeraray xero ciidamadu leeyihiin, falkaas oo niyad jab ku keenay bulshada Somaliland iyo inta danaysa qadiyadeena, waxaana hirgelinta doorashada tijaabada ahayd oo dhacday saacado ka dib markii falkaasi dhacay ay daaha saartay oo dabooshay muuqaalkii xumaa waxayna indhaha caalamka ku soo celisay inay Somaliland duruuf kasta oo ay marayso ay tahay mid ku socota Jidkii nabadeed iyo kii dimuqraadiyadeed ee ay mudada soo haysay.
Si kastaba ha ahaatee iyadoo todobaadkan gudihiisa wadamada Maraykanka iyo Denmark oo safka hore kaga jira wadamada bixiya dhaqaalaha doorashooyinka Somaliland ay ka hadleen sida ay ugu qanacsan yihiin geeddi socodka dimuqraadiyadeed ee Somaliland, si gaar ahna ay dawladda Denmark xaqiijisay inay xafiis ka furanayso Somaliland, ayaa waxaa hubaal ah in doorashada tijaabada ahayd ay wadankan u lahayd ahmiyad ka qoto dheer ujeedada laga lahaa.
Xuseen aadan Yuusuf (Kurdi)
Xuskurdi@gmail.com