Gabaygan waxaa curiyay abwaan DEEQ MAXAMED NUUX {deeq dheere} abwaanku wuxuu kaga hadlayaa dhibaatooyinka uu qaadku ku leeyahay bulshada Soomaalida iyo sida aanu aduunka kale ula qabin dhibkaa wuxuu abwaanku sheegayaa sifooyin
waxaanu ku bilaabay sida tan:-
Qarnigii la joogaaba waa qoomam gooniyae
Qasaarahan dad haystaa ma jirin qaybihii tagaye
Qaribaadan taalaana waa qaadiyo ehelkiiye
Qac ka siiya iyo fuuqsabay qurux is moodaane
Qiijinta sigaarkaa uga roon qaalma dayr dhal ahe
Qamrigoo la fuuqfuuqsaday qaac is bidayaane
Nayn naynta qaaday la tahay inay qudh gooyeene
Markuu qaadka yara raamasaduu qaraxya sheegtaaye
Markaasuu qaraaba iyo ehel qururux moodaaye
Dadku waa qaniinkoo kaluu qiil ku sheegtaaye
Anigaa u wada qamarjiyuu qawl yidhaahdaaye
Haduu meel ku yara qayliyoo qarashna waydiiyo
Uu laba marduuf oo qariban dayn u sii qaato
Inuu qayrki dhaafay la tahay qaaxaduu cunaye
Afkoo deeb leh buu soo qoslaa waana qaab nacase
Qurux bay la tahay oo ma oga qoomaduu yahaye
Siduu qaydhin cunay buu afkana qori mudmudayaaye
Markaasuu qiyaas uma socdee qararaf leeyaaye
Quusan maayo jeeruu inuun yara qaniinaaye
Qaadkan aad arkaysaana waa quudul xaaraane
Soomaaliyoo qudhuu qaatay oo dilaye
Qaranada kaleetaba ma jiro ciidan qayilaaye
Allahayow adaa qaadiroo noo qadaray saase
Naga qabo balaayo iyo qaxar qaadir baad tahaye
Dadkan qolof engagay ee hadana qaadka uun cunaya
Ee wada qalooca u socdee qaladka uun ooga
Uu qaatay baladaa iblays noo qurxiyay haatan
Ee wada qamuumyaysanee qarash uun doonaaya
Waxaasoo qafladina eeboow qaadka weeyaane
Naga qabo balaayo iyo qaxar qaadir baad tahaye
By Deeq Maxamed Nuux (Deeq Dheere)