Muqdisho(ANN) Madaxweynaha dawladda taagta daran ee KMG Somalia Shariif Sheekh Axmed ayaa markii u horaysay ka hadlay kaalmada deeqda ay Somaliland gaadhsiisay dadka abaaraha, macaluusha iyo dagaaladu naafeeyeen ee Somalia. Sh. Shariif oo maanta
ka hadlayay kulan lagu qabtay magaalada Muqdisho ayaa soo dhaweeyay deeqaha ay Somaliland ugu talagashay dadka ay abaaruhu ku dhufteen ee koonfurta Somalia, wuxuuna ku tilmaamay gurmadka Somaliland talaabo wanaagsan,
Wuxuuna isagoo yidhi, “waxaad la socotaan inay magaalada inala joogaan walaaleheen Woqooyiga Somaliland oo noo soo gurmaday, taasina waa calaamad fiican, waana uga mahad celinaynaa oo soo dhowaynaynaa, ummada Soomaaliyeedna waa Ummad mid ah Illaahay ayaa mideeyay oo wax baddan ka mideeyay, dhaawacii gaadhay (Somaliland) waxaan u baahannahay inaan u xalino sida ugu fiican, si walalnimo leh oo is xushmayn leh oo is qadarin leh, baahida loo qabo midnimona qof kasta oo Soomaali ah waad dareensanyahay. Laakiin waxaa loo baahan yahay inaan ku dhiirano oo aan ka dhawaajino qeexnana habka ugu wanaagsan ee ay midnimadaasi ku iman karto.” Ayuu yidhi Sh. Shariif